Svimjing

FøroyaMeistarastevna (FM) og JuniorMeistarastevna (JM)

Talan er um FøroyaMeistarastevnuna (FM) og JuniorMeistarastevnuna 2021 (JM), sum í ár er flutt til at vera partur av hesum fyrstu Føroyaleikum.

Kappast verður í tríggjar dagar, har juniormeistaraheitini verða avgreidd fyrrapart, umframt tá eisini, hvørji sum sleppa víðari at kappast um føroyameistaraheitini seinnapart.

Luttakararnir

Juniorar eru í ár gentur føddar í 2004-2007 og dreingir føddir í 2003-2006, sum vit í Føroyum so aftur hava býtt upp í hvør sínar tveir bólkar á tveir árgangir, kallaðir eldri og yngri juniorar.

Á Føroyameistarastevnuni kunnu allir føroyskir svimjarar luttaka, óansæð aldur, sum  seinasta árið hava klárað eina ávísa kravtíð í greinini, ið stutt sagt er hin sama sum til at fáa bronsunál.

Kappingin

Kappast verður á langgeil, í øllum teimum greinum sum føroysk met kunnu setast í. Hetta eru somu greinar sum FINA brúkar til HM og heimsmet, og LEN til EM og evropamet.

FM verður avgreitt við innleiðandi riðlum fyrrapart og finalum seinnapart, sum vit kenna tað frá eisini FM á stuttgeil, og frá altjóða stevnum sum til dømis HM, EM og Oyggjaleikum.

JM verður avgreitt sum partur av hesum somu innleiðandi riðlum til FM, har vinnararnir tá verða funnir við at hyggja í úrslitalistarnar, aftaná at øll hesi viðkomandi hava svomið.

Heiðursmerki og stroyming

Heiðursmerki verða givin í øllum greinum, til juniormeistararnar í leypi av stevnupørtunum fyrrapart, og til føroyameistarnarar í leypi av finalupørtunum seinnapart.

Svimjisambandið ætlar at stroyma frá allari stevnuni, við egnari útgerð og manning.

Sí eisini https://ssf.fo/2021/06/08/innbjoding-til-fm-og-jm-a-langgeil-2021/

Scroll to Top
X