Tá Oyggjaleikirnir á Guernsey í 2021 vórðu avlýstir vegna Covid19, gjørdi ÍSF av at skipa fyri aðrari líknandi stevnu í Føroyum. Og nú tað er kunngjørt, at vanligu Oyggjaleikirnir ikki verða aftur fyrr enn í 2023, er endaliga avgjørt at halda fyrstu Føroyaleikirnar í døgunum 8. til 11. juli 2021.

Miðað verður ímóti, at leikirnir skulu fevna um allar føroyskar ítróttagreinar, sum eru umboðaðar í ÍSF, og ætlanin er at skipa fyri kappingum í fýra ymsum kommunum kring landið.

Kommunurnar, sum fara at hýsa hesum fyrstu Føroyaleikunum, eru Vágur, Tórshavn, Runavík og Klaksvík, sum eisini hava víst tiltakinum stóran áhuga og vælvild. Í samráð við ÍSF og ymsu sersambondini fara hesar kommunurnar at skipa fyri góðum kørmum um Føroyaleikirnar og fyri øll tey luttakandi í ymsu ítróttargreinunum.

ÍSF ásetir hvar í landinum hesar ymsu ítróttagreinarnar skulu kappast, men annars verða tað sambondini, sum sjálvi seta kappingartreytirnar fyri sína ítróttagrein. Til dømis kunnu tey sjálvi velja, hvørt tað verður ein kapping fyri bestu deildirnar einans – ella um tey eisini vilja hava til dømis børn og ung ella útlendingar við. Á enskum verða leikirnir nevndir »Faroe Games«.

Sjálvandi verður serliga koronastøðan havd í huga, og øll galdandi tilmæli skulu fylgjast. Allir luttakarar, sum koma úr øðrum londum, skulu hava negativa 4. dags test, fyri at kunna luttaka – um hetta tilmælið væl at merkja framvegis verður galdandi til ta tíð.

Ætlanin er at menna Føroyaleikirnar ár um ár, bæði við kørmum, møguleikum og útlendskum gestum, og ÍSF sær stórar vaksrtrarmøguleikar í tiltakinum, sum fyri nógvar ítróttargreinar er sera kærkomið, nú tey ikki hava kunnað luttikið í altjóða kappingum annað árið á rað.

Høvuðsstuðlar til Føroyaleikir 2021, eru SMS, Sport 24, Hiddenfjord og Betri Trygging.